Nýjustu færslurnar í dagbókinni

Kl. 10:42: Sjúkraþjálfun 

Fór í sjúkraþjálfun í gær ... ég á að vera dugleg að gera styrktaræfingarnar fyrir spjaldhrygginn, en að forðast magadans og karate amk. fram að næsta tíma, sem er eftir tvær vikur.

Það er eins gott að það er einhver sem hefur vit fyrir mér, því ekki hef ég það sjálf. Í fyrsta magadanstímanum mínum eftir hlé á mánudaginn, kvaldist ég í mörgum æfingum, ss. við að hoppa á öðrum fæti, hoppa jafnfætis, að gera áttur, camel, shimmi, teygja mig upp o.s.frv. En það var samt ekki fyrr en sjúkraþjálfarinn sagði það, að ég velti því fyrir mér hvort ég ætti ekki bara að bíða með að æfa þar til ég er orðin góð í bakinu!

Ég ætla samt að mæta á mánudögum hér eftir og amk. skrifa niður þá dansa sem bætast við núna og skella þeim svo inn á síðuna fyrir ykkur hinar sem gætuð notið góðs af!

Varanleg slóð

Kl. 01:53: Byrjuð aftur! 

Jæja, í kvöld byrjaði ég aftur að æfa magadans ... eða ég fór öllu heldur á æfingu. Ég veit ekki hvað það er langt síðan ég fór síðast á æfingu, en ég veit að það eru um tæp tvö ár síðan ég æfði reglulega með elítuhópnum!

Í stuttu máli sagt hætti ég að æfa á síðustu meðgöngu, hætti að kenna meðgöngumagadans seint á meðgöngunni, byrjaði ekki að æfa aftur af ráði, hef haldið tvö námskeið á Siglufirði og kennt staka meðgöngumagadanstíma í Jógasetrinu hjá Auði Bjarna síðan.

Við Már fórum á vorsýningu Magadanshússins í Salnum og ég gjörsamlega kolféll fyrir tribal magadansinum sem elítuhópurinn sýndi með Rositsu ... vá hvað mig langaði að hoppa á næstu æfingu með þeim þá. Svo fór ég og horfði á Magadanskeppnina um þar síðustu helgi, og þá gerðist eitthvað, ég sá svo margar stelpur sem komu mér á óvart, mér fannst Hrafnhildur hafa fundið sig í dramatíkinni, Berglind fékk mig til að langa að læra mikla og flotta tækni, mér fannst Rósalind hafa bætt sig svo mikið síðan í fyrra, Fífí fékk mig til að hlæja og langa til að dansa, Jóhanna var svo töfrandi og grande ... Heiða var náttúrulega bara svöl .... mig langaði bara svo að taka þátt í þessu öllu með þeim, mig langaði að vera memm!

Í vor byrjaði ég náttúrulega að æfa karate aftur eftir langt hlé, nema hvað, ég byjaði á því að fara í hnjánum ... of mikið álag á þau þegar ég er svona þung að byrjað að æfa aftur af fullum krafti. Jæja, með aðstoð sjúkraþjálfarans míns er það mál úr sögunni ... nema hvað, nú er það spjaldhryggurinn og mjöðmin sem eru eitthvað að stríða mér. Er enn að reyna að leysa það með sjúkraþjálfaranum, en góðir hlutir gerast víst hægt! En planið er sem sagt að byrja að æfa karate aftur á fullu, með magadans "on the side" ... stefnan er sett á að ná næstu beltisgráðu í karateinu þegar ég er búin að ná mér í mjöðminni og mögulega að fara að kenna byrjendum ef ég stenst kröfur félagsins. Það er alltaf gott að hafa háleit markmið!

Fyrsta æfingin hjá mér í nýja Magadanshúsinu í Skeifunni var sem sagt í kvöld, og ómægod, hvað ég finn fyrir því að það er langt síðan ég hef verið í tíma hjá Josy ... og fyrir mjöðminni, fann mikið til í henni líka í kvöld! En það var virkilega gaman. Josy byrjaði að kenna nýjan dans sem hún stefnir á að hafa í jólasýningu hússins .. held ég amk. Veit ekki hvort ég nái honum fyllilega, þar sem að ég mun einungis ná að mæta á mánudögum til að byrja með ... við sjáum til. Ef ég næ honum, skal ég pikka hann hér inn. Ég sagði EF!

Allavegana, alltaf gaman að dansa, vona bara að sjúkraþjálfarinn minn verði ekki reiður þegar ég hitti hann á morgun og ég er orðin aum í mjöðminni aftur ... "já en það er bara svo gaman að dansa".

Kveðjur til þeirra sem ramba hingað inn af slysni og lesa röflið í mér.

Svör frá lesendum (1) | Varanleg slóð

Kl. 19:18: Rimilei - stikkorð 

Smá svona handa nemendunum sem ég kenndi um daginn fyrir Jóhönnu. Hér er textinn með sporunum við Rimilei-lagið sem ég hengdi upp á speglana þegar ég var að kenna dansinn:

1. Snúa úlnliðum (x8)
2. 8x Maya
3. Basic Egypt - niður, sparka ; niður, sparka ; niður, niður ; stíga, stíga (allt x2)
4. 2x Opposite Maya - hendur: "5,6,7", kassi: "og 8"
5. Sveifla (h), sveifla (v), 2x Pelvis Camel;
   Sveifla (h), SNÚA, sveifla (v), 2x Pelvis Camel
6. Basic Egypt "Hress" + maya-ganga (allt x2)
7. Snúa til h, snúa til v, 4 bömp, 2 húla (allt x2)
8. 4x Maya
9. Basic Egypt - niður, sparka ; niður, sparka ; niður, niður ; stíga, stíga (allt x2)
10. 4x Opposite Maya
11. Sveifla (h), sveifla (v), 2x Pelvis Camel;
    Sveifla (h), SNÚA, sveifla (v), 2x Pelvis Camel
12. Basic Egypt "Hress" + maya-ganga (allt x1)
13. Snúa til h, snúa til v, 4 bömp, 2 húla (allt x2)
14. Shimmy (færa hendur x8)
15. Snúa til h, snúa til v, 4 bömp, 2 húla (allt x2)
16. 4x Maya, hendur upp og horfa svo upp.

Varanleg slóð

Kl. 19:20: Búningarnir mínir 

Fyndin tilviljun, ég lánaði tveimur keppendum búning á föstudaginn ... búningarnir lentu báðir í 3.sæti!!! Merkilegt.

Sendu þitt svar | Varanleg slóð

Kl. 14:21: Magadanskeppnin 2006 

Magadanskeppnin var síðastliðinn föstudag og við Már skelltum okkur á hana. Við skemmtum okkur mjög vel. Þrátt fyrir tæknilega örðuleika, miklar biðir eftir að keppnin hæfist og úrslitum dómnefndar, og óundirbúinn og á köflum ósmekklegan kynni sem gekk að mínu mati of langt í sölumennsku á magadansi.

En keppendur voru frábærir. Það var hreint unaðslegt að horfa á stúlkurnar dansa og sýna hvað í þeim býr. Mér fannst gaman að fá að vera áhorfandi í fyrsta skipti og líka mjög gaman að sjá marga dansara dansa líka í fyrsta skipti. Dansarnir voru jafnfjölbreyttir og dansararnir voru margir og það hefur ekki verið neinn hægðarleikur að vera dómari í ár.
Ég lék mér að því að giska á það hverjir mundu lenda í sætum í hlénu, þar sem ég hef verið svo oft dómari þá veit ég fyrir hvaða atriði er verið að gefa stig og hvað skiptir máli í hvaða flokki o.s.frv. En mér fannst bara alls ekkert auðvelt að giska, þegar ég var að diskútera þetta við Má og Lilju sessunaut, kom það mér á óvart hvað það voru í raun margar sem komu til greina í sætin sex, það var rúmlega helmingur keppenda sem hefði auðveldlega getað lent í sæti ... en svona er þetta það geta bara þrír lent í sæti í hvorum flokki fyrir sig, svo að vonandi nutu þær hinar sín í botn, sem ekki lentu í sætum, við það að sýna frumsamda dansin sinn. Það hver lenti í sæti hvar, byggði svo mikið á því hvað dómarar lögðu mesta áherslu.

Sem hlutlaus áhorfandi útí sal, fannst mér vanta að fá að vita hver atkvæði áhorfenda hefðu verið. Ég veit að atkvæði áhorfenda geta haft áhrif á röðun keppenda, en oft er salurinn ekki sammála dómurunum og stundum lendir vinsælasti keppandinn ekki einu sinni í sæti ... ég var forvitin að vita hvert "the popular vote" hefði verið í ár ... mér finnst að það mætti jafnvel veita stúlkunni sem hlýtur það sérverðlaun á næsta ári!

En þetta var stórskemmtileg kvöldstund, það var virkilega gaman að sjá hvað var mikið lagt í allt, það voru allir með allt í botni ... og þá er líka svo skemmtilegt að horfa á. Tveir dómaranna dönsuðu, annars vegar Rosana, sem er náttúrulega bara algjör díva ... sú hefur aldeilis lagt mikið á sig undanfarið ár og bætt sig heilmikið. Hins vegar dansaði Dondi. Dondi kom mér á óvart, vegna þess að oftast þegar heimsfrægir dansarar hafa komið hingað og sýnt opinberlega, taka þeir sig svo alvarlega og sýna virðulega og þokkafulla dansa. Dondi gerði það ekki, stærsti hlutinn af hennar 17 mínútna dansnúmeri var brandari (eða ég vona það allavegana), ég hló útí eitt, hún sýndi fyndin svipbrigði og teygði mörk dansins útí hreina kómídíu. Þetta var mjög kærkomin hvíld eftir að hafa horft á hverja dívuna á fætur annarri stíga á svið og keppa stórfenglega. Þetta minnti mig óneitanlega á Marlyn Monroe shimmi-brandarann hennar á Bellydance Superstars myndbandinu ... hún er svo fyndin!

Allavegana, til hamingju stúlkur (sem tókuð þátt), með keppnina. Mér fannst þið algjört æði, ég hlakka til að sjá meira á næsta ári ... það er svo gaman að sjá dansara þroskast og stækka á milli ára, maður sér það svo skírt þegar maður sér árlegan viðburð eins og Magadanskeppnina. Takk fyrir mig!!!

Sendu þitt svar | Varanleg slóð

Kl. 10:06: Magadanskeppnin greinilega að nálgast 

Ég fór í Magadanshúsið að kenna tíma fyrir Jóhönnu í gær, vegna þess að hún er svo upptekin í keppnisundirbúningnum og leikhúsvinnunni þessa dagana ... og vá hvað það var fyndið að vera þarna. Það voru allir, eða svo virtist vera, uppstrílaðir, að æfa sig eða hjálpa örðum að æfa fyrir keppnina á föstudaginn. Á meðan að Josy var að kenna venjulegan tíma í einum sal var hinn salurinn og hvert horn og rými nýtt til að æfa keppnisdansa og máta og prófa búninga.

Fyrir þá sem ekki vita það, þá er Magadanskeppnin á föstudaginn nk. í tónlistarhúsi Ýmis. Keppendur eru að standa sig mjög vel í undirbúningnum. Það er svo gaman að sjá hvað allir leggja mikið í þetta, æfa í búningum í marga daga fyrir keppni (til að venjast honum við dansinn), allir keppendur að hjálpast að, gagnrýna og hrósa hvorri annarri ... þetta er augljóslega vinalegur og vel undirbúinn hópur sem keppir í ár. Og afrakstur slíkrar vinnu hlýtur að vera flott sýning, ekki satt? Ég hélt mér til hlés og reyndi að sjá sem minnst í gærkvöldi, til að halda spennunni í hámarki fyrir föstudagskvöldið.

Magadanskeppnin hefur frá upphafi verið uppáhalds magadansuppákoman mín á ári hverju. Þar koma nemendur og sýna afrakstur sinn í magadansi. Nemendur hafa valið tónlist, samið sjálfar dans við hana, æft sig og æft undir stundina stóru. Afraksturinn er stórkostleg sýning þar sem persónulegur stíll hverrar og einnar skín í gegn, hver dans frábrugðinn þeim næsta. Konfekt fyrir magadansunnanda augað.

Ég hlakka mikið til að vera hlutlaus áhorfandi útí sal á föstudaginn og njóta sýningarinnar í botn, en þetta verður í fyrsta skipti frá upphafi sem ég er hvorki að dæma né keppa í keppninni!

Sendu þitt svar | Varanleg slóð

Kl. 12:32: Byrjendur 1 

Jæja, þá er er ég byrjuð að kenna aftur og mér finnst það vera æðislega gaman og gefandi ... 2,5 mánuði eftir fæðingu!!! Síðast tók það mig tvöfalt lengri tíma að byrja að kenna aftur.

Ég tók eftir því að síðan mín þarf að fara í smá andlitslyftingu til að fylgja breytingunum sem hafa átt sér stað í byrjendakennslunni í Magadanshúsinu, eins og röðin á dönsunum sem eru nú kenndir o.þ.h.

Þar til andlitslyftingin hér hefur gengið í garð, þá eru hér dansarnir sem kenndir eru í byrjendahópunum um þessar mundir:

• Aquila / KissKiss
• Rimilei dance

Sendu þitt svar | Varanleg slóð

Kl. 22:59: Á ég að þora? 

Jæja, þá hún Úlfrún orðin 6 vikna gömul og magadansflugan er byrjuð að suða aftur inní mér ... það fer að líða að því að ég mæti á æfingu. Er ekki spurning um að byrja aftur á byrjuninni, eða á ég bara að demba mér á elítu-æfingu, hvað finnst ykkur???

Svör frá lesendum (4) | Varanleg slóð