Hver er Parvana?

Skrifað 8. september 0000, kl. 14:22

Ég heiti Kristína og hóf að æfa magadans hjá Josy Zareen haustið 2001, en fyrir ári síðan opnaði hún sitt eigið Magadanshús þar sem ég æfi og kenni magadans í dag. Í Magadanshúsinu er ég í svokölluðum Elítu-hópi ... en það er sá framhaldshópur sem hefur æft lengst hjá Josy.

Ég drógst í magadans af algjörri tilviljun. Tveir vinkonuhópar mínir fengu þá flugu í hausinn á sama tíma að prófa að læra magadans. Hóparnir lentu á mismunandi æfingatímum, en ég gat ekki gert upp á milli þeirra og ákvað að fara bara í þá alla. Þeim fannst ég vera svo afbragðsklár í þessu, en það var náttúrulega algjör misskilningur, ég var bara að æfa helmingi oftar en þær! Eftir þetta eina námskeið héldu nokkrar áfram, en í dag er ég ein eftir í dansinum úr báðum vinkonuhópunum. Ég hef náttúrulega grætt enn einn vinkonuhópinn í magadansinum.

Þegar ég dansa gleymi ég stund og stað, ég breytist í flögrandi fiðrildi eða tignarlegan svan. Ég nýt þess í botn að dansa og dýrka allt sem honum fylgir, kannski vegna þess að ég er ekki þessi dæmigerða íþrótta- eða dansaratýpa. Þess vegna er ég svo ánægð með að hafa fundið mér þessa hreyfingu sem ég get notið mín í. En magadans er meira en bara hreyfing, heldur er hún líka listform sem getur verið fjölbreytt, lífrænt og flókið, og það höfðar til mín.

Þessi bloggsíða mín átti upprunalega bara að vera fyrir mig og innihalda glósur úr magadanstímum sem ég vildi ekki eiga á hættu að tína, en þegar nokkrar stelpur komust á snoðir um hana, breiddist hún fljótt út. Núna inniheldur síðan mín miklu meira en bara nokkrar glósur, hún endurspeglar að einhverju leiti þennan litla magadansheim sem ég lifi og hrærist í, á þessu ólíklega magadanslandi ... Íslandi.

Njótið heil, Parvana.