Ung magadansmær

Skrifað 14. apríl 2004, kl. 00:49

Ég lenti í svo skemmtilegri reynslu eftir byrjendatímann sem ég kenndi í kvöld. Það komu þrjár mæðgur saman í tímann, móðir með tvær litlar dætur, sem eru allar dansinum greinilega vel kunnar frá heimalandi sínu.

Eftir tímann vatt eldri dóttirin sér að mér (um 8 ára, held ég), og bað um að fá að dansa fyrir mig. Ég varð auðvitað við ósk hennar, enda ekki á hverjum degi sem maður fær svona gott boð ... og fékk líka að njóta þessarrar fínu magadanssýningar. Hún bað mig að velja bara eittvað lag að handahófi fyrir sig, svo spann hún bara og impróviseraði með þvílíkum tilþrifum og innlifun að ég hef nú sjaldan séð annað eins!

Stúlkan er sannur magadansari og hefur nú þegar allt það sem svo margir eru lengi að öðlast í magadansi ... sjálfstraust, öryggi og þokka. Ég hlakka til að fylgjast með þeim mæðgunum.